पाल्पा, २७ कार्तिक । पालिका स्तरीय द्रुत प्रतिकार्य समिति र द्रुत प्रतिकार्य टोली सम्बन्धी पैरवी कार्यक्रम रामपुर नगरपालिकामा बुधबार सम्पन्न भएको छ । विश्व स्वास्थ्य संगठन नेपालको आयोजना र रामपुर नगरपालिकाको समन्वयमा पैरवी कार्यक्रम सम्पन्न भएको हो ।कार्यक्रममा नगरपालिका भित्र सम्भावित स्वास्थ्यजन्य विपद र यसको न्यूनीकरण तथा व्यवस्थापनका विषयमा अभिमुखिकरण प्रदान गरिएको थियो । स्वास्थ्यजन्य विपदको समयमा द्रुत प्रतिकार्य समिति र द्रुत प्रतिकार्य टोलीको भूमिका , काम कर्तव्य र अधिकारका विषयमा छलफल भएको थियो ।नगरपालिकाको सभाहलमा भएको कार्यक्रममा बोल्दै रामपुर नगरपालिकाका उपप्रमुख तथा कार्यबहाक नगर प्रमुख बाल कुमारी थापाले नगरपालिका भित्र हुन सक्ने सम्भावित विपदलाई न्यूनीकरण र यसको प्रकोप फैलन नदिन सबै सचेत भई एक भएर लाग्नु पर्ने बताउनुभयो । उहाँले पछिल्लो केही वर्षयता रामपुरमा कालाजार रोगका विरामीको संख्या बढ्दो रहेकाले यसबाट बच्नका लागि सचेतना संगै अभियान सञ्चालन गर्नु पर्ने आवश्यकता औँल्याउनुभयो । साथै कालाजार रोगको शंका लाग्ने विरामी फेला परेमा तत्काल जाँच गरि उपचारका लागि सिफारिस गर्न स्वास्थ्यकर्मीहरुलाई आग्रह गर्नुभयो । उपप्रमुख थापाले रामपुर नगरपालिकालाई कालाजार रोगमुक्त गर्नका लागि आवश्यक कार्यक्रम सञ्चालन गर्ने बताउनु भएको छ । थापाले विपद न्यूनीकरण र विपद पश्चात व्यवस्थापनका लागि पालिका स्तरमा रहेको द्रुत प्रतिकार्य समिति र टोली दुवैले महत्वका साथ काम गर्नु पर्नेमा जोड दिनुभयो । यस्तै रामपुर नगरपालिकाका प्रमुख प्रशासकीय अधिकृत सुर्य दर्शन पण्डितले विगतको समयमा भएका स्वास्थ्यजन्य विपदको अनुभवबाट सिकेर भविष्यमा हुन सक्ने विपद्लाई रोक्न सचेतना सहित सबै तयारी अवस्थामा रहनु पर्ने बताउनुभयो । उहाँले हरेक विपद मानविय स्वास्थ्य संग जोडिने भन्दै सर्वसाधारण जनतालाई सचेत बनाउन विभिन्न शिविर तथा अभियान सञ्चालन गर्न सके महामारी र विपदबाट बच्न सकिने बताउनुभयो । कार्यक्रममा जिल्ला स्वास्थ्य कार्यालय पाल्पाका निमित्त कार्यालय प्रमुख टुक प्रसाद पोखरेलले स्वास्थ्यजन्य विपद नियन्त्रण र व्यवस्थापनका लागि समिति र टोली दुवैलाई सक्रिय बनाउनका लागि पैरवी कार्यक्रमको आयोजना गरिएको बताउनुभयो । उहाँले सरुवा रोगबाट निम्तिने विपद न्यूनीकरण हुँदै आए पनि नसर्ने रोग नियन्त्रण गर्ने चुनौती रहेको उल्लेख गर्नुभयो । कार्यक्रममा जिल्ला स्वास्थ्य कार्यालय पाल्पाका ल्याब असिस्टेन्ट मधुसुधन भट्टराईले अन्य पालिकाको तुलनामा रामपुर नगरपालिकामा कालाजार रोगको विरामी धेरै रहेकोले यसको नियन्त्रण गर्नु पर्ने बताउनुभयो ।
साथै उहाँले पालिका स्तरमा रहेको समिति र टोलीको काम कर्तव्य र अधिकार संगै कानुनी व्यवस्थाको बारेमा जानकारी दिनु भएको थयो ।यस्तै विश्व स्वास्थ्य संगठन नेपालका फिल्ड मेडिकल अफिसर डाक्टर गौरव डंगोलले रामपुर नगरपालिका डेंगी र कालाजार रोग महामारीको जोखिममा रहेको भन्दै सचेत हुन आवश्यक रहेको बताउनुभयो । साथै विपदको यकीन तथ्याङ्क प्रमाणित गरि स्वास्थ्यजन्य विपदको नियन्त्रण र व्यवस्थापनमा तत्काल लाग्न द्रुत प्रतिकार्य समिति र टोलीलाई आग्रह गर्नुभयो । रामपुर नगरपालिकाका स्वास्थ्य शाखा प्रमुख गिरिराज घिमिरेले हरेक विपदको समयमा मानविय सहायताका लागि स्वास्थ्यकर्मीको नै मुख्य भूमिका रहेने भएकाले सक्रियताका साथ लाग्नु पर्नेमा जोड दिनुभयो । कार्यक्रममा स्वास्थ्यजन्य विपदको समयमा गर्नु पर्ने काम ,रोकथाम तथा न्यूनीकरण , पूर्व तयारी ,पुनस्थापना कार्य , विपद जोगखिमको नक्साङ्कन ,कानुनी व्यवस्था , द्रुत प्रतिकार्य समिति र टोलीको आवश्यकता लगायतका विषमा सहजिकरण गरिएको थियो । रामपुर नगरपालिकाका जनप्रतिनिधि , स्वास्थ्यकर्मीहरुको सहभागिता रहेको पैरवी कार्यक्रमको सहजिकरण विश्व स्वस्थ्य संगठन नेपालका फिल्ड मेडिकल अफिसर डाक्टर गौरव डंगोल र जिल्ला स्वस्थ्य कार्यालय पाल्पाका मधुसुधन भट्टराईले गर्नु भएको थियो । रामपुर नगरपालिकाका प्रमुख प्रशासकीय अधिकृत सुर्य दर्शन पण्डितको अध्यक्षतामा भएको कार्यक्रम कार्यबहाक नगर प्रमुख तथा उपप्रमुख बाल कुमारी थापाको प्रमुख आतिथ्यतामा सम्पन्न भएको हो । कार्यक्रमको सञ्चालन रामपुर नगरपालिकाका स्वास्थ्य शाखा प्रमुख गिरिराज घिमिरेले गर्नु भएको थियो ।