काठमाडौँ,१७ फागुन । नेपाल राष्ट्र बैंकले बैंक तथा वित्तीय संस्थाहरूलाई आवश्यक सेवा निरन्तर उपलब्ध गराउन निर्देशन दिएको छ।
निर्वाचन आयोगको अनुरोध अनुसार केन्द्रीय बैंकले सार्वजनिक बिदाका दिनसमेत वित्तीय कारोबार सञ्चालन गर्ने व्यवस्था मिलाउन सम्बन्धित संस्थाहरूलाई सूचित गरेको हो। आगामी २०८२ साल फागुन २१ गते बिहीबार हुने निर्वाचनलाई दृष्टिगत गर्दै नेपाल सरकारले फागुन २०, २१ र २२ गते सार्वजनिक बिदा घोषणा गरेको छ। यसअघि फागुन १८ गते हिमाली तथा पहाडी क्षेत्रका ५६ जिल्लामा र फागुन १९ गते तराईका २१ जिल्लामा होली पर्वका कारण सार्वजनिक बिदा परेको छ।
उक्त अवधिमा सरकारी राजस्व संकलन तथा भुक्तानीसम्बन्धी कार्य प्रभावित नहोस् भन्ने उद्देश्यले सरकारी कारोबारका लागि तोकिएका वाणिज्य बैंकका शाखा तथा काउन्टरहरू सञ्चालनमा राख्न निर्देशन दिइएको छ।
त्यसैगरी निर्वाचन प्रचारप्रसारका लागि बैंक खाता सञ्चालन गर्ने संस्था तथा निकायमार्फत राजनीतिक दल र उम्मेदवारहरूको नगद, चेक वा अन्य विनिमय उपकरणमार्फत हुने जम्मा तथा भुक्तानीसम्बन्धी बैंकिङ सेवा उपलब्ध गराउन समेत राष्ट्र बैंकले व्यवस्था मिलाउन भनेको छ।