बुटवल,११ माघ । हस्पिटालिटी र कफी क्षेत्रको तालिममा पश्चिम नेपालकै अग्रणी संस्था ‘फ्लेयर कोड इन्स्टिच्युट अफ हस्पिटालिटी’ ले आफ्नो स्थापनाको १० औं वर्ष सफलतापूर्वक पूरा गरेको छ। यस अवसरमा संस्थाले बुटवलमा एक विशेष समारोह आयोजना गरी दश वर्षको यात्राको समीक्षा, कफी क्षेत्रको सम्भावनाबारे अन्तर्क्रिया र सामाजिक उत्तरदायित्वका कार्यक्रमहरू सार्वजनिक गरेको छ।

दश वर्षको उपलब्धि: सीपबाट स्वरोजगारको मार्ग

दश वर्षअघि सामान्य बार टेन्डर तालिमबाट सुरु भएको फ्लेयर कोडले हालसम्म १० हजारभन्दा बढी युवाहरूलाई व्यावसायिक तालिम प्रदान गरिसकेको छ। वार्षिकोत्सवमा जानकारी दिइए अनुसार, संस्थाले अहिले बार टेन्डर, ब्यारिस्ता (कफी), सुसी, र बेकरी जस्ता विधामा उच्चस्तरीय तालिम प्रदान गर्दै आएको छ। तालिम मात्र नभई नेपाली कफीको खेती, प्रशोधन, रोस्टिङ र इटालियन कफी मेसिनहरूको बिक्री वितरणमा समेत यस संस्थाले पश्चिम नेपालमा एकछत्र पहिचान बनाएको छ।

कफी बहस: “पहाडका हरेक कुना कफीले ढाकिनुपर्छ”

वार्षिकोत्सवको मुख्य आकर्षणका रूपमा “नेपाली कफीको बजारीकरणमा सरोकारवालाको भूमिका” विषयक अन्तर्क्रिया कार्यक्रम सम्पन्न भयो। उक्त प्यानल छलफलमा सहभागी विज्ञहरूले नेपाली कफीका निम्न पक्षमा जोड दिएका थिए:
१. विश्वस्तरको गुणस्तर: नेपाली कफीको स्वाद र गुणस्तर अन्तर्राष्ट्रिय बजारमा उत्कृष्ट मानिए पनि माग अनुसारको उत्पादन हुन नसकेको।
२. युवाको भूमिका: केवल गुनासो मात्र नगरी युवाहरूले कृषि र कफी पर्यटनमा रहेका अवसरहरूलाई पछ्याउनुपर्ने।
३. सरकारी लगानी: कफीलाई प्रमुख नगदे बालीका रूपमा विकास गर्न सरकारले ठोस नीति र लगानी ल्याउनुपर्ने।
४. रोजगारीको स्रोत: उत्पादकदेखि ब्यारिस्ता चेनमा लाखौंको आम्दानी र रोजगारीको अवसर रहेको।
उक्त बहसमा ड्याडीज किचनका संस्थापक कमल जंग कुँवर, कफी कृषक समुन्द्र घिमिरे, कफी रोस्टर पूर्ण बहादुर गुरुङ र फ्लेयर कोडका प्रोप्राइटर संजय घिमिरेले कफीको उत्पादनदेखि कपसम्मको यात्रामा देखिएका चुनौती र समाधानबारे आफ्ना धारणा राख्नुभएको थियो।

५ लाखको ‘उज्ज्यालो भविष्य छात्रवृत्ति कोष’ घोषणा

व्यावसायिक सफलतासँगै सामाजिक उत्तरदायित्वलाई प्राथमिकता दिँदै फ्लेयर कोडले ५ लाख रुपैयाँ राशिको “उज्ज्यालो भविष्य छात्रवृत्ति कोष” स्थापना गरेको छ। संस्थाकी सञ्चालक बिन्दु खरेलका अनुसार, आर्थिक अभावका कारण रुपन्देहीका कुनै पनि विद्यार्थीले शिक्षाबाट वञ्चित हुन नपरोस् भन्ने उद्देश्यले यो कोष खडा गरिएको हो। आगामी ५ वर्षसम्म हरेक वर्ष १ लाख रुपैयाँका दरले जिल्लाका विभिन्न विद्यालयका जेहेन्दार विद्यार्थीहरूलाई छात्रवृत्ति वितरण गरिने जानकारी उहाँले दिनुभयो।

प्रमुख अतिथिको सम्बोधन: “नेपालमै अवसर छ”

कार्यक्रमका प्रमुख अतिथि, राष्ट्रिय स्तरका सफल युवा व्यवसायी एवं ड्याडीज किचनका संस्थापक कमल जंग कुँवरले नेपालमा काम गर्ने वातावरण छैन भन्नु केवल भ्रम मात्र भएको बताउनुभयो। उहाँले भन्नुभयो, “मैले देशभर सञ्चालन गरेका आउटलेटहरूमा नेपाली कफी नै प्रयोग गर्ने गरेको छु, तर उत्पादन पर्याप्त नहुँदा समस्या भोग्नुपरेको छ। नेपाली युवाहरू विदेश गए पनि त्यहाँ सीप सिकेर स्वदेश फर्किएर काम गर्नुपर्छ, त्यस्ता युवाहरूलाई हामी सहयोग गर्न तयार छौँ।” उहाँले फ्लेयर कोडबाट उत्पादित जनशक्तिले आफ्नो संस्थामा उत्कृष्ट काम गरिरहेको र आगामी दिनमा पनि प्राथमिकता दिने प्रतिबद्धता व्यक्त गर्नुभयो।

सम्मान तथा समापन

वार्षिकोत्सव समारोहमा संस्थामा लामो समयदेखि अविचलित रूपमा कार्य गर्ने कर्मचारीहरू र संस्थालाई विभिन्न माध्यमबाट सहयोग गर्ने शुभेच्छुकहरूलाई ‘मायाको चिनो’ सहित सम्मान गरिएको थियो।
विशिष्ट अतिथि को फार्मका सञ्चालक एवं जैविक पर्यटन अभियन्ता समुन्द्र घिमिरे, लुम्बिनी बौद्ध विश्वविद्यालयका व्यवस्थापन विभाग प्रमुख, होटल तथा पर्यटन व्यवसायी, शिक्षण संस्थाका प्रतिनिधि, पत्रकार र विद्यार्थीहरूको उल्लेख्य उपस्थिति रहेको उक्त कार्यक्रम सुमन पौडेलको सञ्चालन र रमेश पन्थीको व्यवस्थापनमा सम्पन्न भएको थियो।