भैरहवा,१३ भदौ । रुपन्देहीको भैरहवास्थित नापी कार्यालयका प्रमुख नापी अधिकृत सुग्रिव यादवले गैरकानूनी सम्पत्ती आर्जन गरेको भन्दै अदालतमा मुद्दा दायर भएको छ । यादवविरुद्ध शुक्रबार अख्तियार दुरुपयोग अनुसन्धान आयोगले विशेष अदालतमा मुद्दा (आरोप पत्र) मुद्दा दायर गरेको हो । अख्तियार यादवलाई मात्रै होइन्, उनको परिवारका सदस्यलाई समेत प्रतिवादी बनाएको छ । आयोगले जारी गरेको विज्ञप्तीमा उनकी श्रीमती गायत्री यादब, छोराहरु सुधान्सु यादब र शुभम यादबलाई पनि प्रतिवादी बनाई अदालतमा मुद्दा दायर भएको छ ।अख्तियारले नापी प्रमुख यादवले ५ करोड ७९ लाख ६२ हजार ४४० रुपैयाँ बराबरको सम्पत्तिको स्रोत पुष्टि गर्न नसकेको जनाएको छ । आयोगका अनुसार सार्वजनिक पद धारण गरेको मिति २०५३/०३/१३ गतेदेखि २०८१/०३/१६ गतेसम्मको जाँच अवधिमा ९ करोड ३ लाख ९५ हजार ४४४ रुपैयाँ आर्जन गरेको देखिएको तर सोही अवधिमा यादवले १४ करोड ८३ लाख ५७ हजार ८८४ रुपैयाँ बराबरको सम्पत्ति खर्च तथा लगानी गरेको खुल्न आएको छ।