बुटवल,१२ बैशाख । रुपन्देहीको बुटवलमा गर्भपतन गराउने क्रममा पाल्पाको बगनासकाली गाउँपालिका–२ को २९ वर्षीया गीता पाण्डेको मृत्यु प्रकरणमा स्त्री तथा प्रसुती रोग विशेषज्ञ डा.सतिस रुपाखेतीलाई निलम्बन गर्ने निर्णय गरिएको छ ।
घटना पश्चात गठित नेपाल मेडिकल काउन्सिलको छानबिन समितिले इन्दुलेखा क्लिनिकमा कार्यरत डा. रुपाखेतीले उपचारमा लापरवाही गरेको पाएपछि उनलाई निलम्बन गर्न सिफारिसका आधारमा  तत्कालका लागि उनलाई निलम्बन गर्ने निर्णय गरेको छानबिन समितिका संयोजक डा.सम्राट पराजुली बताए । त्यस्तै उपचारमा संलग्न स्वास्थ्यकर्मीलाई पनि कारबाही गर्न सिफारिस गरिएको छ।
शनिवार पत्रकार सम्मेलनको आयोजना गरेर घटनाको छानबिन प्रतिवेदन सार्वजनिक गर्दै काउन्सिलका सदस्य समेत रहेका संयोजक डा। पराजुलीले ईन्दुलेखा क्लिनिक र जोनल फार्मेसीलाई सञ्चालनमा तत्कालका लागि रोक लगाउन जिल्ला प्रशासन कार्यालयलाई पत्राचार गरिने बताए । उनका अनुसार, गीता पाण्डेयलाई गर्भपतनको औषधि उपलब्ध गराउने जोनल फार्मेसी र अन्तिम अवस्थामा गर्भपतनका लागि संलग्न रहेको ईन्दुलेखा स्वास्थ्य क्लिनिकले सेवा प्रवाहका लागि स्वीकृति नलिएको देखिएको छ।
गर्भपतन गराउने क्रममा हुर्किरहेको गर्भसहित आमाको ज्यान गएको थियो। उपचारमा संलग्न दुई चिकित्सकसहित पाँच जना स्वास्थ्यकर्मीहरुलाई नियन्त्रणमा लिएर प्रहरीले घटनाको अनुसन्धान जारी राखेको छ। नेपाल मेडिकल काउन्सिलले छानविन समिति गठन गरेर अनुसन्धान शुरु गरेपछि शुक्रवार परिवारले शव बुझेका थिए । उपचारमा संलग्न चिकित्सकहरुलाई कानुन अनुसार कारवाहीका लागि पीडित परिवारले माग गरिरहेका छन् । पाण्डेको पेटमा १२ हप्ताको हुर्किरहेको गर्भसहित अकालमै आमाको ज्यान गएको थियो । उपचारमा संलग्न दुई चिकित्सकसहित पाँच जना स्वास्थ्यकर्मीहरुलाई प्रहरीले नियन्त्रणमा लिएर अनुसन्धान गरिरहेको छ ।